शिव स्पंदन : प्रतिनिधी | मुंबई
क्रिकेट जगतातील महानायक सचिन तेंडुलकर यांनी अखेर आपल्या मुलगा अर्जुन तेंडुलकरच्या साखरपुड्याविषयी असलेल्या चर्चांना पूर्णविराम दिला आहे. मागील काही महिन्यांपासून अर्जुन आणि सानिया चांडोक यांच्या नातेसंबंधाबद्दल सोशल मीडियावर अनेक बातम्या झळकत होत्या, परंतु तेंडुलकर कुटुंबाकडून यावर अधिकृत प्रतिक्रिया नव्हती. आता स्वतः सचिनने या नात्याला दुजोरा दिला आहे.
सचिनची पहिली प्रतिक्रिया
रेडिटवरील एका चर्चासत्रात चाहत्यांनी अर्जुनच्या वैयक्तिक आयुष्याविषयी प्रश्न विचारला. त्यावेळी सचिन म्हणाले, “हो, अर्जुन आणि सानियाने साखरपुडा केला आहे. आम्ही सगळेच या आनंदात सहभागी झालो असून पुढच्या टप्प्याची आतुरतेने वाट पाहत आहोत.” १३ ऑगस्ट २०२५ रोजी मुंबईत दोघांनी अंगठ्या देवून हा सोहळा साध्या पद्धतीने पार पाडला. आता लग्नाच्या तारखेची घोषणा लवकरच होणार असल्याचे संकेत आहेत.
सानिया चांडोकची ओळख
सानिया ही नामांकित उद्योगपती रवी घई यांची नात आहे. घई कुटुंब हॉटेल व्यवसायासह ब्रुकलिन क्रीमरी आणि ग्रॅव्हिस गुड फूड्ससारख्या आंतरराष्ट्रीय ब्रँड्सशी संबंधित आहे. सानियाने मात्र स्वतंत्र उद्यमशीलतेचा मार्ग निवडला आहे. ती मुंबईत मिस्टर पॉज नावाचे प्रीमियम पेट केअर सेंटर आणि स्पा चालवते. लंडन स्कूल ऑफ इकॉनॉमिक्समधून तिने शिक्षण घेतले असून ती अर्जुनची बहीण सारा तेंडुलकरशी विशेष जिव्हाळ्याची आहे.
क्रिकेटमधील अर्जुनचा प्रवास
२५ वर्षीय अर्जुन तेंडुलकर सध्या गोव्याच्या रणजी संघाकडून खेळतो आणि आयपीएलमध्ये मुंबई इंडियन्सचा सदस्य आहे. मात्र मागील हंगामात त्याला खेळण्याची संधी मिळाली नव्हती. डावखुरा वेगवान गोलंदाज म्हणून त्याने आपले कौशल्य सिद्ध केले असून भविष्यात फलंदाजीतही आश्चर्यचकित करण्याची क्षमता असल्याचे जाणकारांचे मत आहे. अर्जुनला योगराज सिंग (माजी खेळाडू व युवराज सिंगचे वडील) यांचे मार्गदर्शनही लाभले आहे.
तेंडुलकर कुटुंबातील या नव्या पर्वामुळे चाहत्यांमध्ये आणि क्रीडा वर्तुळात आनंदाचे वातावरण निर्माण झाले आहे.
