शिव स्पंदन : प्रतिनिधी | मुंबई :
महायुती सरकारने विधानसभा निवडणुकीच्या पार्श्वभूमीवर सुरू केलेल्या ‘मुख्यमंत्री माझी लाडकी बहीण’ या योजनेत प्रचंड गैरव्यवहार झाल्याचे वास्तव समोर आले आहे. राज्यातील तब्बल २६ लाखाहून अधिक महिलांनी या योजनेचा लाभ घेतला असला तरी त्या प्रत्यक्षात पात्र नव्हत्या, असे प्राथमिक तपासणीत उघड झाले आहे.
महिला व बालविकास मंत्री अदिती तटकरे यांनी सांगितले की, विभागाच्या प्राथमिक छाननीनंतर ही आकडेवारी समोर आली असून लाभार्थ्यांची सविस्तर पडताळणी जिल्हा स्तरावर सुरू आहे. “जिल्हा प्रशासनाच्या माध्यमातून पात्र व अपात्र लाभार्थ्यांची माहिती घेतली जात आहे. छाननीनंतर अपात्र ठरणाऱ्यांविरुद्ध योग्य ती पावले उचलली जातील. तसेच खरोखरच पात्र असणाऱ्या महिलांना योजनांचा लाभ मिळावा यासाठी प्रयत्न होणार आहेत,” असे त्या म्हणाल्या.
या योजनेसाठी सुमारे १५०० कोटी रुपयांचा निधी वितरित करण्यात आला होता. मात्र लाखो अपात्र महिलांना लाभ मिळाल्याने सरकारी निधीचा दुरुपयोग झाल्याचे स्पष्ट झाले आहे.
अदिती तटकरे यांनी पुढे सांगितले की, या प्रकरणात मुख्यमंत्री एकनाथ शिंदे, उपमुख्यमंत्री अजित पवार आणि देवेंद्र फडणवीस यांच्या मार्गदर्शनानुसार पुढील कारवाई होईल.
दरम्यान, उपमुख्यमंत्री व अर्थमंत्री अजित पवार यांनी स्पष्ट केले की, “अपात्र लाभार्थ्यांकडून सरकार निधी परत घेणार नाही. मात्र भविष्यात अशा प्रकारचे गैरप्रकार होऊ नयेत, यासाठी काटेकोर उपाययोजना केली जाणार आहे.”
या घडामोडीमुळे राज्याच्या राजकीय वर्तुळात खळबळ उडाली असून विरोधक आगामी काळात सरकारला यावरून धारेवर धरण्याची शक्यता आहे.
