शिव स्पंदन : प्रतिनिधी | शिरुर
सण-उत्सव काळात नागरिकांचा आनंद अबाधित राहावा, शहरात सुव्यवस्था टिकून राहावी यासाठी दिवस-रात्र मेहनत घेणाऱ्या पोलीस बांधवांचा तसेच नगरपरिषदेकडून उत्तम नियोजन करून दिलेल्या विविध सोयी-सुविधा पुरविणाऱ्या कर्मचाऱ्यांचा महाराष्ट्र राज्य मराठी पत्रकार संघाच्यावतीने शिरूर येथे गौरव करण्यात आला. हा सोहळा त्यांच्या कार्यप्रवृत्तीस मान्यता देणारा विशेष उपक्रम ठरला.
या विशेष सोहळ्यात शिरूर पोलीस स्टेशनचे निरीक्षक संदेश केंजळे, पोलीस उपनिरीक्षक शुभम चव्हाण, हनुमंत नकाते, दिलीप पवार यांचा सन्मान करण्यात आला. त्याचबरोबर शिरूर नगरपरिषदेचे मुख्याधिकारी प्रितम पाटील, प्रशासकीय अधिकारी राहुल पिसाळ, स्वच्छता विभागाचे आदित्य बनकर, बांधकाम विभागाचे समाधान मुंगसे, विद्युत विभागाचे तेजस शिंदे, नगररचना विभागाचे पंकज काकड यांचाही विशेष गौरव करण्यात आला.
या कार्यक्रमाला शिरूर तालुका पत्रकार संघाचे वरिष्ठ अध्यक्ष संतोष शिंदे, तालुकाध्यक्ष अर्जुन बढे, शहराध्यक्ष बबन वाघमारे, उपतालुकाध्यक्ष भाऊसाहेब खपके, महिला शहराध्यक्षा अश्विनी सांगळे, तसेच धर्मा मैड, सचिन जाधव, किरण चौधरी, शहर उपाध्यक्षा रूपाली खिलारी, दक्षता समितीच्या शोभना पाचंगे, भाजपच्या महिला शहराध्यक्षा प्रिया बिरादार, आधार छाया फाउंडेशनच्या सविता बोरुडे यांसह अनेक मान्यवर उपस्थित होते.
सण-उत्सवाच्या काळात कुटुंबासोबत साजरा करण्याऐवजी नागरिकांच्या सुरक्षेसाठी बंदोबस्तावर तैनात राहणारे पोलीस बांधव समाजाप्रती आपली जबाबदारी प्रामाणिकपणे पार पाडतात. त्याचप्रमाणे नगरपरिषदेकडून योग्य नियोजन करून स्वच्छता, प्रकाशव्यवस्था, वाहतूक व्यवस्थापन आणि इतर मूलभूत सुविधा पुरवल्या जातात. यामुळे नागरिकांना उत्सव आनंदात व सुरक्षिततेत साजरा करता येतो. याच कार्याची दखल घेत पत्रकार संघटनेतर्फे हा सन्मान सोहळा आयोजित करण्यात आला.
कार्यक्रमाचे प्रास्ताविक अर्जुन बढे यांनी केले. स्वागत संतोष शिंदे यांनी तर आभारप्रदर्शन अश्विनी सांगळे यांनी केले.
या सोहळ्यातून पत्रकार संघटनेने पोलीस व नगरपरिषद कर्मचाऱ्यांबद्दल कृतज्ञता व्यक्त करून समाजातील त्यांच्या महत्त्वपूर्ण योगदानाची दखल घेतली.
