शिव स्पंदन : प्रतिनिधी |
मुंबई ते कोकण या मार्गावर प्रवाशांसाठी रो-रो (Roll-on Roll-off) फेरी सेवा सुरु होण्याच्या तयारीत आहे. या सेवेची सुरुवात १ किंवा २ सप्टेंबरपासून होणार असून हवामान परिस्थिती सुधारताच प्रवासाला परवानगी दिली जाणार आहे.
भाजप नेते नितेश राणे यांनी पत्रकार परिषदेत माहिती दिली की, माजी मुख्यमंत्री देवेंद्र फडणवीस यांनी मांडलेली ही संकल्पना आता प्रत्यक्षात उतरणार आहे. समुद्रमार्गे कोकणात पोहोचण्याचा प्रवास जलद, सुरक्षित आणि सुखकर करण्याचा सरकारचा उद्देश आहे.
या सेवेसाठी ‘M2M’ नावाची बोट सज्ज असून मुंबईतील भाऊचा धक्का येथून ती सुटेल. मार्गात जयगड आणि विजयदुर्ग येथे थांबे असतील. २५ नॉट्स वेगाने धावणारी ही बोट दक्षिण आशियातील सर्वात वेगवान प्रवासी फेरी ठरेल. मुंबई ते रत्नागिरी प्रवास तीन ते साडेतीन तासांत आणि मुंबई ते सिंधुदुर्ग पाच तासांत पूर्ण होईल.
प्रवाशांसाठी विविध श्रेणींची सोय करण्यात आली आहे. इकोनॉमी २,५०० रुपये, प्रीमियम इकोनॉमी ४,००० रुपये, बिझनेस क्लास ७,५०० रुपये आणि फर्स्ट क्लास ९,००० रुपये असा दर ठरविण्यात आला आहे. वाहनांसाठी स्वतंत्र डेकची सोय असून चारचाकी वाहनासाठी ६,००० रुपये आणि मिनीबससाठी १३,००० रुपये इतका दर असेल. एकावेळी ५० गाड्या वाहतूक करण्याची क्षमता बोटीमध्ये आहे.
या फेरी सेवेमुळे रस्त्यावरील ट्रॅफिकचा त्रास टाळून कोकणात जलद आणि आरामदायी प्रवास करता येणार आहे. प्रवाशांचा वेळ वाचेल आणि पर्यटनास चालना मिळून स्थानिक अर्थव्यवस्थेलाही फायदा होणार आहे.
