शिव स्पंदन : प्रतिनिधी |
साताऱ्याच्या ऐतिहासिक प्रतापगड किल्ल्यावर खासदार नीलेश लंके यांच्या नेतृत्वाखाली भव्य गड संवर्धन मोहीम राबवण्यात आली. या मोहिमेत शेकडो युवक, महिला, शिवप्रेमी आणि स्थानिक ग्रामस्थांनी उत्स्फूर्त सहभाग नोंदवला. गडाच्या तटबंदीवरील गवत, झुडपे व कचरा हटवून किल्ल्याचा परिसर स्वच्छ करण्यात आला. डोंगरकिल्ल्यांच्या संवर्धनासाठी सुरू झालेल्या या मोहिमेमुळे प्रतापगड पुन्हा एकदा शिवभक्तांच्या घोषणांनी दुमदुमून गेला. “जय भवानी, जय शिवाजी”च्या घोषणा देत युवकांनी श्रमदान केले आणि महाराजांच्या पराक्रमाचा वारसा जपण्याची शपथ घेतली.
खासदार नीलेश लंके यांनी उपस्थितांना संबोधित करताना सांगितले की गड-किल्ले हे फक्त दगडाचे बांधकाम नसून ते आपल्या स्वाभिमानाचे प्रतीक आहेत. इतिहासाची प्रेरणा भावी पिढ्यांपर्यंत पोहोचवायची असेल तर गड संवर्धनाला सर्वांनी सामूहिक जबाबदारी मानली पाहिजे. गड जिवंत राहतील तरच पुढच्या पिढ्यांना प्रेरणा अखंड राहील. केवळ चर्चेत वेळ घालवून काही होणार नाही, प्रत्यक्ष श्रमदान, स्वच्छता, झाडाझुडपे काढणे आणि संवर्धनाची कामे हाती घेणे आवश्यक आहे.
या मोहिमेत सामाजिक विषयांवरही त्यांनी स्पष्ट भूमिका मांडली. समाजाच्या हक्कासाठी आरक्षणावर ठोस निर्णय होणे गरजेचे असून मतदान प्रक्रियेत पारदर्शकता यावी यासाठी प्रत्येक मतदाराचे नाव आधारशी जोडले जाणे आवश्यक आहे, असे ते म्हणाले. त्यांनी समाजातील प्रत्येक घटकाला न्याय देण्याची जबाबदारी लोकप्रतिनिधींवर असल्याचे सांगत आपण या कामात कटिबद्ध आहोत, असेही स्पष्ट केले.
प्रतापगडाच्या तटबंदीवर झालेल्या या उपक्रमामुळे शिवभक्तांना महाराजांच्या शौर्यकथांची पुन्हा एकदा आठवण झाली. प्रतापगडावर घुमलेल्या गर्जना, युवकांची मेहनत आणि सामूहिक श्रमदानामुळे गड संवर्धन चळवळीला नवे बळ मिळाले आहे. लोकसहभागातूनच इतिहासाचे वैभव टिकवता येते आणि प्रतापगडावरील ही मोहीम त्याचे उत्तम उदाहरण ठरली आहे.
