शिव स्पंदन : प्रतिनिधी तालुका –
शिरूर तालुक्यातील मौजे इनामगाव, घुमरेवस्ती दर्यापट येथे अज्ञात चोरट्यांनी घरात घुसून वृद्ध महिलेला मारहाण केली व रोकड लंपास केली. ही घटना २१ ऑगस्टच्या रात्री ९ वाजता ते २२ ऑगस्टच्या सकाळी साडेआठ वाजेच्या दरम्यान घडली असून परिसरात मोठी खळबळ उडाली आहे.
फिर्यादी अनिल विठ्ठल घुमरे (वय ६५, व्यवसाय – शेती) यांनी दिलेल्या माहितीनुसार, त्यांच्या घरातील पत्रपेटीत ठेवलेली १०,००० रुपयांची रोकड तसेच त्यांच्या ‘गावकरी’ नावाच्या हॉटेलच्या काऊंटरमध्ये ठेवलेली १३,४०० रुपयांची रोकड असे मिळून २३,४०० रुपये अज्ञात चोरट्यांनी चोरून नेले. चोरी दरम्यान घडलेल्या झटापटीत फिर्यादींच्या आईला चोरट्यांनी डोक्यात वार करून गंभीर दुखापत केली.
या घटनेमुळे ग्रामस्थांमध्ये भीतीचे वातावरण पसरले असून लोकांमध्ये संताप व्यक्त होत आहे. “गावात चोरीच्या घटना वाढत आहेत. पोलिसांनी नियमित गस्त वाढवावी आणि चोरट्यांना तातडीने पकडावे,” अशी मागणी ग्रामस्थांकडून होत आहे.
दरम्यान, घटनेची माहिती मिळताच पोलिसांनी तातडीने घटनास्थळी धाव घेतली व पंचनामा केला. चोरट्यांचा शोध घेण्यासाठी तपास पथक तयार करण्यात आले आहे. परिसरातील सीसीटीव्ही फुटेज, संशयित व्यक्तींची हालचाल आणि गावकऱ्यांची माहिती यावरून तपास सुरू असून आरोपी लवकरच पोलिसांच्या जाळ्यात अडकतील, असा विश्वास पोलिसांनी व्यक्त केला आहे.
सध्या या घटनेमुळे घुमरेवस्ती व आसपासच्या गावांमध्ये दहशतीचे वातावरण असून नागरिकांनी आपापल्या घरांच्या सुरक्षिततेबाबत जागरूक राहण्याचे आवाहनही पोलिसांनी केले आहे.
