शिव स्पंदन : प्रतिनिधी : शिरूर
शिरूर तालुक्यात गेल्या काही वर्षांपासून कायदा व सुव्यवस्थेला आव्हान देणाऱ्या आणि वारंवार गंभीर गुन्हे करणाऱ्या विकास उर्फ काज्या बाबाजी चोरे (वय 25, रा. डोंगरगण, ता. शिरूर) याला महाराष्ट्र प्रतिबंधक धोकादायक व्यक्ती कायदा (MPDA) अंतर्गत स्थानबद्ध करण्यात आले आहे.
सततची गुन्हेगारी पार्श्वभूमी :
पोलिसांच्या माहितीनुसार, 2022 ते 2025 या काळात विकास चोरे याच्यावर खुनाचा प्रयत्न, जमाव जमवून दंगल घडवणे, गंभीर दुखापत करणे, धमक्या देणे, विनयभंग, बेकायदेशीर शस्त्र बाळगणे, तसेच परवानगीशिवाय मुरुमाचे उत्खनन व विक्री यांसारखे एकूण पाच गंभीर गुन्हे दाखल झाले. अनेक वेळा अटक व प्रतिबंधक कारवाई करूनही त्याच्या वर्तनात बदल झाला नाही, असा आरोप पोलिसांकडून करण्यात आला.
शिफारस आणि आदेश :
या गुन्हेगारी पार्श्वभूमीमुळे पुणे ग्रामीण पोलिस अधीक्षक संदीप सिंह गिल्ल यांनी धोकादायक इसम म्हणून स्थानबद्ध करण्याची शिफारस केली. शिरूर पोलिस निरीक्षक संदेश केंजळे यांनी या अनुषंगाने प्रस्ताव सादर केला. प्रस्तावाची तपासणी करून जिल्हाधिकारी जितेंद्र डूडी यांनी 19 सप्टेंबर 2025 रोजी स्थानबद्धतेचा आदेश मंजूर केला.
अंमलबजावणीची मोहीम :
आदेशानुसार, उपविभागीय पोलिस अधिकारी प्रशांत ढोले यांच्या मार्गदर्शनाखाली 19 सप्टेंबरच्या रात्री 11.37 वाजता शिरूर पोलिसांनी डोंगरगण गावातून विकास चोरे याला ताब्यात घेतले. 20 सप्टेंबरच्या पहाटे त्याला अमरावती मध्यवर्ती कारागृहात हलविण्यात आले.
या कारवाईत अप्पर पोलिस अधीक्षक रमेश चोपडे, स्थानिक गुन्हे अन्वेषण शाखेचे पोलिस निरीक्षक अविनाश शिळीमकर, शिरूर पोलिस ठाण्याचे उपनिरीक्षक शुभम चव्हाण, फौजदार महेश बनकर, पोलिस हवालदार मंगेश थिगळे, परशुराम सांगळे, तसेच सचिन भोई, नितेश थोरात, अजय पाटील, विजय शिंदे, निखील रावडे, अंबादास थोरे आणि निरज पिसाळ यांनी समन्वय साधून विशेष मोहीम राबवली.
शिरूर पोलिसांचा इशारा :
शिरूर पोलिस ठाण्याने गेल्या दोन वर्षांत एकूण पाच सराईत गुन्हेगारांना MPDA अंतर्गत स्थानबद्ध केले आहे. “गुन्हेगारांना कोणतीही गय केली जाणार नाही. आगामी काळात मोक्का, भारतीय न्याय संहिता कलम 111 (सघंटीत गुन्हेगारी) व 112 (किरकोळ सघंटीत गुन्हेगारी) प्रमाणे कारवाई सुरू राहील,” असे पोलिस निरीक्षक संदेश केंजळे यांनी स्पष्ट केले.
