शिव स्पंदन : प्रतिनिधी, शिरुर :
शहराच्या सामाजिक, राजकीय आणि शैक्षणिक क्षेत्रात आपला ठसा उमटवणारे ज्येष्ठ नेते कांतिलाल झुंबरलाल बाफना (वय ८७) यांचे गुरुवारी (ता. ११) रात्री निधन झाले. त्यांच्या पश्चात पत्नी, दोन मुले, एक मुलगी, सुना व नातवंडे असा मोठा परिवार आहे.
समाजवादी कार्याचा दीर्घ प्रवास:
स्थानिक पातळीवर ‘पाहुणे’ म्हणून ओळख असलेल्या बाफना यांनी शिरुर, पारनेर व श्रीगोंदा या तालुक्यांत भांडे विक्रीचा व्यवसाय उभा केला. मात्र व्यावसायिक यशासोबतच सामाजिक बांधिलकी जपणे हे त्यांचे वैशिष्ट्य राहिले. जनता दल (धर्मनिरपेक्ष) मध्ये कार्यरत राहून त्यांनी संघटनात्मक कामात विविध पदांची जबाबदारी पार पाडली. शेतकरी, कामगार व श्रमकरी वर्गाच्या अडचणी सोडवण्यासाठी त्यांनी अनेक वर्षे सातत्याने प्रयत्न केले.
राष्ट्रीय पातळीवरील नाळ :
दुष्काळी परिस्थितीचा आढावा घेण्यासाठी माजी पंतप्रधान व्ही. पी. सिंग शिरुर येथे आले असता त्यांनी बाफना यांच्या निवासस्थानी भेट देऊन चर्चा केली होती. त्यांचा माजी खासदार संभाजीराव काकडे यांच्याशीही घनिष्ठ संपर्क होता.
शिक्षणक्षेत्रातील योगदान :
रयत शिक्षण संस्थेच्या न्यू इंग्लिश स्कूल, शिरुरच्या स्थानिक सल्लागार समितीचे उपाध्यक्ष म्हणून त्यांनी शैक्षणिक क्षेत्रातही कार्य केले. विद्यार्थ्यांना दर्जेदार शिक्षणाची संधी मिळावी, यासाठी ते नेहमी पुढाकार घेत.
कुटुंब व सामाजिक वारसा :
कांतिलाल बाफना यांच्या पत्नी सुषमा बाफना या शिरुर नगरपरिषदेच्या माजी सभापती आहेत. मोठे पुत्र संजय बाफना हे भाजपचे जिल्हा कोषाध्यक्ष असून धाकटे पुत्र सुनील बाफना हे ऑल इंडियन जैन कॉन्फरन्स (पंचम झोन) चे प्रांतीय अध्यक्ष व शिरुरचे माजी नगरसेवक आहेत.
कांतिलाल बाफना यांच्या निधनामुळे शिरुर तालुक्यातील समाजवादी, शैक्षणिक आणि व्यापारी क्षेत्रात एक मोठी पोकळी निर्माण झाली असून, यांचे कार्य पुढील पिढ्यांना सदैव प्रेरणादायी राहील; त्यांच्या स्मृतींना विनम्र अभिवादन.
