शिरुरमध्ये अमोल ज्वेलर्सवर १.३८ कोटींचा भयंकर दरोडा

शिव स्पंदन : प्रतिनिधी : शिरुर, २४,सप्टेंबर

शहरातील मध्यवर्ती आणि नेहमीच वर्दळीच्या सरदार पेठ भागात असलेल्या ‘अमोल ज्वेलर्स अ‍ॅण्ड सन्स प्रायव्हेट लिमिटेड’ या नामवंत सराफ दुकानावर अज्ञात चोरट्यांनी आज पहाटे ‘हाय प्रोफाईल हल्ला’ केला. फिल्मी पद्धतीने उचकटलेले शटर, फोडलेली काच, बंद झालेली सुरक्षा प्रणाली आणि अचूक वेळेत झालेली चोरी, हे पाहता हा गुन्हा कोणीतरी कसलेल्या टोळीने अगदी नियोजनबद्ध पद्धतीने केला असल्याचे स्पष्ट होते.

घटना :

24 सप्टेंबर रोजी पहाटे 4 ते 4.35 दरम्यान घडली. शहराच्या मध्यभागी, वर्दळीच्या भागात, पोलिस स्टेशनपासून काहीच अंतरावर इतकी मोठी चोरी होणे सुरक्षेच्या संपूर्ण यंत्रणेला कठीण प्रश्न देणारी बाब आहे. पोलिसांच्या गस्त व्यवस्था फेल ठरली असून नागरिकांमध्ये प्रचंड भीती पसरली आहे.

चोरीचा कालावधी :

फक्त 35 मिनिटे – पण नुकसान अफाट..! सुरक्षारक्षक नसलेली सकाळची पहाट… 4:00 ते 4:35 वाजेच्या दरम्यान, शटरचे कुलूप तोडून चोरट्यांनी दुकानात प्रवेश केला. विशेष म्हणजे दुकानात कोणताही अलार्म वाजला नाही, सुरक्षेची यंत्रणा निष्क्रिय करण्यात आली होती, यावरून चोरीपूर्वी सर्व अभ्यास पूर्ण केल्याचे दिसते.

चोरीला गेलेल्या दागिन्यांचा तपशील –

दुकानाचे मालक वैभव पुरुषोत्तम जोशी (वय 45) यांनी दिलेल्या माहितीवरून चोरीस गेलेल्या ऐवजाची यादीच थक्क करणारी आहे :

चांदीचे दागिने : पैंजण, तोडे, वाळे, चैन, हत्ती मोरा कडे इत्यादी – 75 टंच, वजन 70 किलो – किंमत : ₹ 63 लाख

चांदीचे जोडवे : विविध प्रकारचे – 7 किलो, किंमत ₹ 7 लाख

सोन्याचे दागिने (मोड व तयार माल) : कर्नफुले, वाटया, मनी, चैन, अंगठ्या – 46 ग्रॅम, किंमत ₹ 4.14 लाख

सोन्याचे पारंपरिक दागिने : गंठण, चैन, राणीहार, टेंपल हार, टेंपल गंठण, शॉर्टर गंठण, लेडीज अंगठ्या, बचकन अंगठ्या – 714 ग्रॅम, किंमत ₹ 64.26 लाख

चोरीस गेलेला एकूण ऐवज : ₹ 1,38,40,000/-

गुन्हेगारांचे व्यावसायिक नियोजन :

चेहऱ्यावर मास्क, हातात हातमोजे, फिंगरप्रिंट नाही.

CCTV सिस्टीम अचूक बंद

कोणताही गोंधळ नाही सरळ, नियोजनबद्ध हालचाली

सॉफ्ट टार्गेट निवडून, दुकानाचे आतून ज्ञान असल्याची शक्यता

पोलिसांची हालचाल :

शिरूर पोलीस ठाण्याचे पथक सकाळी घटनास्थळी दाखल झाले. सीसीटीव्ही फुटेज, फिंगरप्रिंट्स आणि इतर तांत्रिक पुरावे गोळा करण्यात आले आहेत. चोरट्यांचा माग काढण्यासाठी परिसरातील रस्ते, टोलनाके व लॉज यांची तपासणी सुरू आहे.

प्रभारी अधिकारी पोलिस निरीक्षक संदेश केंजळे यांच्या मार्गदर्शनाखाली पोलीस तातडीने आणि काटेकोरपणे पुढील कारवाई करत आहेत. पोलीस तपास वेगाने सुरू असून चोरट्यांचा लवकरच माग काढण्यात येईल, असा विश्वास पोलिस निरीक्षक संदेश केंजळे यांनी व्यक्त केला आहे.

या धाडसी चोरीमुळे शिरूर परिसरात खळबळ उडाली असून सराफ व्यावसायिकांमध्ये चिंतेचे वातावरण निर्माण झाले आहे.

1 कोटी 38 लाख रुपयांची चोरी आता केवळ आर्थिक गुन्हा न राहता, शहराच्या सुरक्षेवरील थेट आक्रमण मानली जात आहे.

शिरूरसारख्या शहरात, ज्याठिकाणी लोक एकमेकांवर विश्वास ठेवतात, तिथं अशी चोरी म्हणजे सामाजिक व्यवस्थेवरील प्रश्नचिन्ह आहे.

केवळ गुन्हेगार शोधून थांबता येणार नाही… सुरक्षा, नियोजन, आणि प्रशासन यांचाही पुनर्विचार होणे गरजेचे आहे.

ही फक्त चोरी नव्हे, हे एक शहराला दिलेलं आव्हान आहे – गुन्हेगारांच्या योजनांपेक्षा आपली सुरक्षा अधिक चपळ आणि सक्षम असली पाहिजे.