शिव स्पंदन : (प्रतिनिधी) : शिरूर, सविंदणे –
शिरूर तालुक्यातील सविंदणे गावातील नाथ नगर वस्ती येथे कौटुंबिक वादातून झालेल्या मारहाणीची घटना उघडकीस आली आहे. या प्रकरणी एका महिलेने पोलिसांकडे तक्रार दाखल केली आहे.
मिळालेल्या माहितीनुसार, फिर्यादी सौ. किशोरी विशाल लंघे (वय 38, रा. नाथ नगर वस्ती, सविंदणे) यांनी आपल्या तक्रारीत म्हटले आहे की, दिनांक 12 सप्टेंबर रोजी सकाळी दहाच्या सुमारास त्या आपल्या घरी असताना मुलगी विशाखाने सांगितले की, जयश्री उर्फ जया राजेंद्र पोखरकर हिने तुला बोलावले आहे. त्यानुसार त्या जयश्रीच्या घरासमोर गेल्या असता, फिर्यादीचे पती विशाल उर्फ गणेश नामदेव लंघे आणि जयश्री पोखरकर दोघेही तेथे उपस्थित होते.
तेथे बोलाचालीदरम्यान जयश्री हिने फिर्यादीवर हल्ला करून हातावर चावा घेतला. प्रतिकार करण्याचा प्रयत्न करताच पती विशाल यांनी काठीने हातावर व डोक्यावर मारहाण केली. त्यानंतर जयश्री हिने पोटावर आणि अंगावरील इतर ठिकाणी लाथा–बुक्क्यांनी मारहाण केल्याचे फिर्यादीने सांगितले. या दरम्यान आरोपींनी शिवीगाळ करून जीवे मारण्याची धमकी दिल्याचा आरोपही फिर्यादीने केला आहे.
घटनेनंतर फिर्यादी शिरूर पोलिस ठाण्यात गेल्या. त्यांना उपचारासाठी शिरूर ग्रामीण रुग्णालयात नेण्यात आले व तेथून पुढील उपचारासाठी ससून हॉस्पिटल, पुणे येथे दाखल करण्यात आले. त्यानंतर त्यांनी पोलिसांत तक्रार दाखल केली.
या प्रकरणी शिरूर पोलिस ठाण्यात गुन्हा दाखल करण्यात आला असून पुढील तपास सुरू आहे.
