शिरूर बसस्थानकावर दहा नव्या बससेवा : प्रिया बिरादार यांच्या नेतृत्वाने प्रवाशांचे प्रश्न सुटले

शिव स्पंदन : प्रतिनिधी , शिरुर :

शिरूर शहरातील मुख्य एसटी बसस्थानकावर गेल्या काही महिन्यांपासून प्रवाशांना विविध अडचणींचा सामना करावा लागत होता. बसची संख्या अपुरी असल्यामुळे ग्रामीण भागातून येणारे विद्यार्थी, नोकरीसाठी प्रवास करणारे कामगार तसेच जेष्ठ नागरिक यांना मोठी गैरसोय होत होती. त्यातच नियोजित वेळेत बस न लागणे, स्थानक परिसरातील अस्वच्छता, महिलांकडून शौचालयासाठी शुल्क आकारले जाणे, पिण्याच्या पाण्याची कमतरता या समस्या अधिकच तीव्र झाल्या होत्या.

या गंभीर परिस्थितीवर तोडगा काढण्यासाठी भाजप महिला आघाडीच्या अध्यक्षा प्रिया बिरादार आणि सामाजिक कार्यकर्ते प्रितेश फुलडाळे यांनी ८ एप्रिल २०२५ रोजी शिरूर एसटी आगार प्रमुखांना सविस्तर निवेदन सादर केले. निवेदनानंतरही त्यांनी सातत्याने पाठपुरावा करत राज्य परिवहन खात्याकडे मागणी पोहोचवली.

तसेच महायुतीचे आमदार माऊली आबा कटके यांच्या सक्रिय सहकार्याने आणि शिरूर एसटी आगाराच्या मॅनेजर मनीषा गायकवाड यांच्या पुढाकाराने प्रथम पाच बससेवा वाढवण्यात आल्या. प्रवाशांच्या वाढत्या गरजांचा विचार करून चालू महिन्यात पुन्हा पाच नवीन बसांची भर घालण्यात आली. यामुळे आता एकूण दहा नवीन बस शिरूर आगाराच्या ताफ्यात दाखल झाल्या असून, दररोजच्या प्रवासाचा ताण मोठ्या प्रमाणात कमी होणार आहे.

बससेवा वाढल्यामुळे ग्रामीण भागातून शिक्षणासाठी येणारे विद्यार्थी, कामगार, व्यापारी तसेच महिला प्रवाशांना प्रवास अधिक सोयीस्कर आणि वेळेवर करता येईल, असा विश्वास स्थानिक नागरिकांनी व्यक्त केला आहे. स्वच्छतेच्या समस्या, पिण्याच्या पाण्याची सोय आणि महिला शौचालयाच्या देखभालीसाठीही डेपो प्रशासनाने सकारात्मक पावले उचलली आहेत.

या संपूर्ण उपक्रमाबद्दल भाजपा महिला आघाडीच्या प्रिया बिरादार यांनी राज्य महामार्ग परिवहन महामंडळाचे विभाग प्रमुख सिया साहेब, शिरूर एसटी डेपो मॅनेजर मनीषा गायकवाड मॅडम तसेच या कार्यात मदत करणाऱ्या सर्व कर्मचारी वर्गांचे मन:पूर्वक अभिनंदन केले. स्थानिक नागरिकांनीही या निर्णयाचे स्वागत करत “हे खऱ्या अर्थाने शिरूरच्या प्रवाशांना दिलासा देणारे पाऊल आहे,” अशा प्रतिक्रिया दिल्या.