शिव स्पंदन : प्रतिनिधी : शिरूर ,दि. २४ नोव्हेंबर २०२५
शिरूर नगरपरिषद निवडणूक २०२५ च्या पार्श्वभूमीवर राष्ट्रवादी काँग्रेस पार्टी (अजित पवार गट)च्या प्रचार मोहिमेला रविवार, दि. २३ रोजी आमदार ज्ञानेश्वर उर्फ माऊली कटके यांच्या दमदार नेतृत्वाखाली उत्स्फूर्त सुरुवात झाली. छत्रपती शिवाजी महाराज पुतळा ते पालखी मार्ग या मुख्य रस्त्यावर भव्य रॅलीने शहरात निवडणुकीचा उत्साह चांगलाच चढला.
कटके यांच्या उपस्थितीने रॅलीला वेगळीच ऊर्जा :
रॅलीत महिला, युवक आणि कार्यकर्त्यांचा जनसागर उसळला होता. ढोल–ताशांच्या गजरात, घोषणांच्या निनादात आणि पक्षध्वजांच्या फडक्यात माऊली कटके यांच्या स्वागताचा जल्लोष पाहायला मिळाला.
रॅलीदरम्यान “कटके साहेब पुढे चला… शिरूर तुमच्यासोबत आहे!” अशा घोषणांनी वातावरण भारावून गेले.
घड्याळ चिन्हासाठी विक्रमी मतांचे कटके यांचे आवाहन :
कार्यक्रमात राष्ट्रवादी काँग्रेस पार्टीच्या नगराध्यक्ष पदाच्या अधिकृत उमेदवार म्हणून सौ. ऐश्वर्याताई अभिजित पाचर्णे यांची घोषणा करण्यात आली.
यावेळी कटके यांनी सर्व उमेदवारांना विक्रमी मतांनी विजय मिळवून देण्यासाठी नागरिकांना आवाहन करत म्हटले—
“शिरूरच्या प्रगतीचा वेग वाढवायचा असेल तर घड्याळ चिन्हासमोरील बटण दाबून विजयी करा.”
“शिरूरचा बदल आमची वचनबद्धता” — कटके :
उत्साहाने भरलेल्या जनसमुदायाला संबोधित करताना आमदार कटके म्हणाले—
“शिरूरचा सर्वांगीण विकास, आधुनिक सुविधा आणि प्रगतीचे नवीन पर्व सुरू करणे हा माझा संकल्प आहे. शिरूरच्या बदलासाठी आपण सर्वांनी एकदिलाने पुढे येऊया.”
त्यांच्या भाषणाला आणि मांडलेल्या विकास आराखड्याला नागरिकांनी टाळ्यांच्या गडगडाटात प्रतिसाद दिला.
रॅलीने दिला दमदार मेसेज :
शेकडो कार्यकर्त्यांचा सहभाग, उत्स्फूर्त नागरिकांची उपस्थिती आणि कटके यांचे प्रभावी नेतृत्व यामुळे राष्ट्रवादी काँग्रेसच्या प्रचाराला जोरदार गती मिळाली. रॅलीने शिरूरमध्ये “राष्ट्रवादी काँग्रेस ताकदीने मैदानात उतरत आहे” असा स्पष्ट संदेश दिला.
