शिव स्पंदन : प्रतिनिधि : शिरूर
शिरूर नगरपरिषदेने थकीत मालमत्ता कर व पाणीपट्टी वसुलीसाठी कडक भूमिका घेत शहरात विशेष वसुली मोहीम राबविण्यास सुरुवात केली आहे. वारंवार सूचना देऊनही कर न भरणाऱ्या मालमत्ता धारकांवर अखेर सील व जप्तीची कारवाई करण्यात आली असून, आज दि. ४ मार्च २०२६ रोजी सी. टी. बोरा कॉलेज रोड परिसरातील श्रीराम मार्केट सिटी येथील दोन मालमत्तांना सील ठोकण्यात आले.
नगरपरिषदेकडून दरवर्षी १ एप्रिल रोजी मालमत्ता कर व पाणीपट्टी भरणे बंधनकारक आहे. आर्थिक वर्षाच्या पहिल्या सहामाहीत कर न भरल्यास संबंधितांवर दंडात्मक कारवाईची तरतूद आहे. महाराष्ट्र नगर परिषद, नगर पंचायत व औद्योगिक नगरी अधिनियम १९६५ मधील कलम १५० (अ) (१) नुसार थकीत रकमेवर दरमहा २ टक्के शास्ती आकारली जाते.
प्रशासनाने संबंधित करदात्यांना चार वेळा लेखी नोटिसा पाठवून तसेच प्रत्यक्ष भेटी देऊन कर भरण्याचे आवाहन केले होते. सप्टेंबर २०२५ पासून विशेष वसुली अभियान राबविण्यात येत असून शहरात जनजागृतीसाठी घोषणा करण्यात आल्या होत्या. मात्र काही मालमत्ता धारकांनी कर भरण्याकडे दुर्लक्ष केल्याने अखेर सील करण्याची कारवाई करण्यात आली.
नगरपरिषदेच्या करसंकलन विभागाने मुख्याधिकारी यांच्या मार्गदर्शनाखाली ही मोहीम अधिक तीव्र केली आहे. आर्थिक वर्ष संपण्यास अवघा कालावधी शिल्लक असल्याने महसूल वसुलीस गती देण्यावर भर देण्यात येत आहे. येत्या काही दिवसांत आणखी थकबाकीदारांवर जप्ती व सीलची कारवाई होणार असल्याचा इशारा प्रशासनाने दिला आहे.
थकीत मालमत्ता धारकांनी तात्काळ थकबाकी भरून कारवाई टाळावी, असे आवाहन मुख्याधिकारी श्री. प्रीतम पाटील यांनी केले आहे. शहराच्या विकासकामांसाठी आणि मूलभूत सेवांच्या सुरळीत अंमलबजावणीसाठी कर भरणे ही प्रत्येक नागरिकाची जबाबदारी असल्याचेही त्यांनी स्पष्ट केले.
