शिरूर पोलिसांचा सज्जतेचा संदेश : शहरात कायदा-सुव्यवस्थेसाठी प्रभावी रूट मार्च

शिव स्पंदन : (प्रतिनिधी) : शिरूर, दि. १३ सप्टेंबर

शिरूर पोलीस स्टेशन हद्दीमध्ये कायदा व सुव्यवस्था अबाधित राखण्यासाठी आज (शनिवार) सायंकाळी ६.३० वाजेपासून ते ७.१५ वाजेपर्यंत शिरूर शहरात भव्य रूट मार्च काढण्यात आला. हा रूट मार्च माननीय श्री. प्रशांत ढोले (उपविभागीय पोलीस अधिकारी, शिरूर विभाग) यांच्या मार्गदर्शनाखाली पार पडला.

शहरातील प्रमुख रस्त्यांवरुन काढण्यात आलेल्या या रूट मार्चमध्ये शिरूर पोलीस स्टेशनचे अधिकारी, अंमलदार तसेच RAF कंपनीचे जवान सहभागी झाले होते. एकूण ५ पोलीस अधिकारी, ४० पोलिस अंमलदार आणि RAF कंपनीचे १ अधिकारी व ४० जवान अशा मोठ्या संख्येने पोलिस बंदोबस्त ठेवण्यात आला होता.

➡ रूट मार्चचा मार्ग:
शिरूर पोलीस स्टेशन पासून सुरुवात करून बीजे कॉर्नर – एसटी स्टँड – राम आळी – पाच कंदील चौक – जैन मंदिर – एसटी स्टँड – डंबे नाला – सोनार आळी – सुभाष चौक – हलवाई चौक – सरदार पेठ मारुती आळी – लाटे आळी – शनी मंदिर अशा प्रमुख मार्गावरुन रूट मार्च काढण्यात आला.

रूट मार्च दरम्यान शहरातील नागरिक मोठ्या संख्येने रस्त्यावर उपस्थित होते. पोलिसांचा शिस्तबद्ध मार्च पाहून नागरिकांनी समाधान व्यक्त केले. अशा प्रकारच्या उपक्रमामुळे नागरिकांमध्ये सुरक्षिततेची भावना निर्माण होते व कायदा-सुव्यवस्था राखण्यासाठी पोलीस नेहमी सज्ज आहेत, हा संदेश समाजामध्ये पोहोचतो.

या प्रसंगी शिरूर पोलीस स्टेशनचे पोलीस निरीक्षक संदेश केंजळे यांनी सांगितले की, “शिरूर शहरातील नागरिकांच्या सुरक्षिततेसाठी पोलिस प्रशासन सतत प्रयत्नशील आहे. रूट मार्चसारख्या उपक्रमामुळे गुन्हेगारीवर अंकुश बसतो तसेच नागरिकांचा पोलिसांवर विश्वास वाढतो.”