शिव स्पंदन : प्रतिनिधि, शिरूर
शिरूर नगरपरिषद निवडणुकीच्या पार्श्वभूमीवर शिरूरमध्ये राजकीय घडामोडींना वेग आला असताना राष्ट्रवादी काँग्रेस (अजित पवार गट)ने स्पष्टपणे प्रचारात आघाडी घेतल्याचे जाणवत आहे. विशेषत: प्रभाग क्र. ३ मध्ये पक्षाने मजबूत उपस्थिती निर्माण केली असून या प्रभागातील वातावरण सकारात्मकतेकडे झुकताना दिसत आहे.
लोकप्रिय विद्यमान आमदार ज्ञानेश्वर (माऊली) कटके यांनी प्रभाग क्र. ३ मध्ये नागरिकांशी थेट संवाद साधत मनमोकळ्या चर्चा करून समस्या व अपेक्षा जाणून घेतल्या. तसेच राष्ट्रवादी काँग्रेस पार्टीच्या नगराध्यक्ष व नगरसेवक पदाच्या अधिकृत उमेदवारांच्या विजयासाठी आवाहन केले.
“शिरूरच्या सर्वांगीण विकासासाठी सक्षम नेतृत्व आवश्यक असून प्रत्येक मत प्रभागाच्या प्रगतीची दिशा ठरवणारे आहे,” असे मत त्यांनी व्यक्त केले.
निवडणूक प्रचारातील या संपर्क मोहिमेमुळे स्थानिक पातळीवर मोठी चळवळ निर्माण झाली असून नागरिकांकडून त्यांना उत्स्फूर्त प्रतिसाद मिळत आहे.
या दौऱ्यात आमदार कटके यांनी नागरिकांच्या अडचणी जाणून घेत उपाययोजना करण्याचे आश्वासन दिले. विशेष म्हणजे भेटीदरम्यान एका अपंग महिला भगिनीला कृत्रिम पाय उपलब्ध करून देण्याचे आश्वासन देत त्यांनी सामाजिक बांधिलकीचा प्रत्यय दिला. या संवेदनशील निर्णयाची जोरदार चर्चा प्रभागात होत असून अनेकांनी त्यांचे कौतुक केले.
सुनिल जाधव : प्रभाग ३मधील प्रचाराचा ‘हॉट फेस’ :
या प्रभागातील सर्व चर्चेचा केंद्रबिंदू ठरत आहेत राष्ट्रवादीचे (अजित पवार गट)चे उमेदवार सुनिल जाधव.
संघर्षातून वाट काढत सर्वसामान्यांमध्ये विश्वास निर्माण करणारे आणि नागरिकांसाठी सतत उपलब्ध राहणारे व्यक्तिमत्त्व म्हणून जाधव ओळखले जातात.
गेल्या अनेक वर्षांपासून समाजकार्य, व्यक्तिगत संवाद आणि साधेपणामुळे त्यांनी लोकांमध्ये विश्वासाचे नाते निर्माण केले आहे.
- सतत लोकांमध्ये उपस्थिती
- तक्रारींवर त्वरित प्रतिसाद
- तरुणांशी चांगले संबंध
- संघर्षातून उभे राहिलेले नेतृत्व
या गुणांमुळे जाधव यांच्या प्रचारात नागरिकांचा उत्स्फूर्त सहभाग दिसून येत आहे.
युवा वर्गाने मोठ्या प्रमाणात प्रचाराची धुरा सांभाळल्याने प्रभागात ऊर्जा आणि स्पर्धात्मक वातावरण निर्माण झाले आहे.
अनेक नागरिकांनी “सुनिल म्हणजे विश्वासाचा चेहरा” अशी प्रतिक्रिया दिल्याचे समोर आले आहे.
माऊली कटके – लोकप्रियता शिगेला :
शिरूर शहरातील विकासकामांना गती देण्यात आणि निधी उपलब्ध करून देण्यात आमदार माऊली कटके यांची निर्णायक भूमिका राहिल्याचे मत नागरिक व्यक्त करीत आहेत. शहरासाठी त्यांनी आणलेला सुमारे ४० कोटींचा निधी, पायाभूत सुविधा उभारणी आणि जनसंपर्काचा सातत्यपूर्ण धागा यामुळे त्यांची लोकप्रियता वाढत असल्याचे चित्र आहे.
प्रचारातील आघाडीचे संकेत?
- प्रभाग ३ मधील सकारात्मक लाट
- युवा वर्गाचा प्रचंड सहभाग
- अल्पकालात वाढलेला जनसंपर्क
- विकासाचे ठोस मुद्दे
या सर्व गोष्टींमुळे अजित पवार गटाला या प्रभागातून भक्कम आधार मिळू शकतो, अशी स्थानिकांची प्रतिक्रिया आहे.
निवडणुकीचा प्रचार पुढील काही दिवसांत अधिक तापणार असून प्रभाग क्र. ३ मध्ये राष्ट्रवादी (अजित पवार गट)ची ही वाढती पकड मतदानाच्या दिवशी कितपत फळ देणार?
सध्या तरी शहरातील चर्चेचा केंद्रबिंदू एकच :
माऊली कटके यांच्या नेतृत्वाखालील प्रचाराने सुनिल जाधव यांना निर्णायक आघाडी मिळणार का?
